Метаболичкиот синдром е група на состојби кои го зголемуваат ризикот од срцеви заболувања, мозочен удар и дијабетес тип 2.
Некои фактори на ризик може да се контролираат со промени во животниот стил. Сигурно треба да го намалите седечкиот начин на живот, нездравата исхрана, прекумерниот внес на калории, недоволното спиење, пушењето и консумирањето алкохол, кои ги зголемуваат шансите за развој на болеста.
Метаболичкиот синдром се дијагностицира со присуство на три од следните пет фактори: висок шеќер во крвта, низок добар холестерол, високи триглицериди, висок крвен притисок и поголем обем на половината.
Сепак, со оглед на тоа што многумина од нас не ја проверуваат редовно крвната слика, тешко е да се открие метаболички синдром.
Обрнете внимание на пет скриени симптоми кои би можеле да укажуваат на тоа дека страдате од метаболички синдром и за кои дефинитивно треба да бидете прегледани од лекар.
Секогаш сте жедни
Диететичарот Кери Конлон истакнува дека „еден од критериумите за метаболички синдром е покаченото ниво на шеќер во крвта на или над 5,6 mmol/L, што може да укажува на отпорност на инсулин“.
Прекумерната жед и зголемената потреба за мокрење се рани предупредувачки знаци дека нивото на шеќер во крвта може да биде над нормалното. Ако често чувствувате жед и не можете да ја задоволите жедта, проверете го шеќерот во крвта.
Секогаш се чувствувате уморни
Се чувствувате исцрпено цело време и не сте сигурни зошто? Можеби тоа е здравствен проблем. Постојат многу причини зошто можеби сте уморни: лош сон, неурамнотежена исхрана, стрес, но ако често се чувствувате уморни, тоа може да биде симптом на висок шеќер во крвта, пишува Eating Well.
Забележувате промени на вашата кожа
Ако сте забележале некои големи промени на вашата кожа, тоа може да биде скриен знак дека имате метаболички синдром. Израстоци на кожата може да настанат како резултат на стареење или други непознати причини, но тие се исто така поврзани со дијабетес и отпорност на инсулин.
Друг знак на метаболички синдром се темни, кадифени дамки на кожата. Тие често се развиваат на задниот дел на вратот, пазувите и препоните. Консултирајте се со дерматолог за какви било проблеми со кожата, пренесува Index.hr.
Чувствувате печење и вкочанетост во нозете
Ако често чувствувате болка, печење и вкочанетост во стапалата, можеби имате метаболички синдром.
„Инсулинската резистенција, високиот крвен притисок, покаченото ниво на шеќер во крвта и абнормалните нивоа на холестерол можат да ги оштетат нервите и крвните садови на долните екстремитети, што доведува до периферна невропатија и васкуларни заболувања“, вели докторот Адам Хочкис.
Чести главоболки
Постојат многу причини за главоболки, како што се дехидрација, стрес и прекумерна употреба на телефони и други уреди како лаптопи, но можеби е изненадувачки да се дознае дека силните главоболки и мигрена се поврзани со хипертензија, според истражувањето објавено од Eating Well. Двете состојби може да имаат слични основни причини, поради што можат да се појават заедно.