Вирус со кој човек може да се зарази за време на орален секс е причина за некои случаи на рак на грлото, тврдат американски експерти.
Секоја година се зголемува бројот на пациенти со дијагноза на рак на рофаринксот , а многу лекари дошле до фактот дека тоа често се случува поради орален секс.
Орофарингеален карцином е форма на рак на главата и вратот кој најчесто ги погодува луѓето на возраст меѓу 50 и 80 години. Сепак, тој е во пораст и кај помладите генерации бидејќи е тесно поврзан со хуманиот папиломавирус (ХПВ).
ХПВ се пренесува сексуално, а клучен фактор на ризик за орофарингеален карцином е бројот на сексуални партнери во текот на животот, особено оралниот секс. Истражувањата покажуваат дека луѓето кои имале шест или повеќе партнери во орален секс имаат 8,5 пати поголем ризик да се заразат со оваа болест.
Оралниот секс го зголемува ризикот од рак на грлото
Овој рак го зафаќа средниот дел на грлото, вклучувајќи го мекото непце, крајниците, задниот дел на јазикот и ѕидовите на грлото. Симптомите вклучуваат болки во грлото што не исчезнуваат, отежнато голтање, неможност целосно да се отвори устата, болка во увото, губење на тежината и грутка во грлото или вратот.
Третманот може да вклучува зрачење, хемотерапија или операција за отстранување на туморот. Случаите предизвикани од ХПВ често имаат подобра прогноза од оние поврзани со пушење или алкохол. Околу 70 проценти од пациентите преживуваат најмалку пет години по дијагнозата.
ХПВ е најчеста сексуално пренослива инфекција во САД, со над 13 милиони нови инфекции годишно. Иако повеќето луѓе успешно ја отстрануваат инфекцијата, кај мал број луѓе вирусот опстојува и може да предизвика рак.