„Во возилото кое беше опожарено пред домот на првиот вицепремиер и министер за политички систем и односи меѓу заедниците, Артан Груби имало поставени светлосни сигнализации и тоа ние ниту прво, ниту, пак, последно возило во кое недозволено има таква сигнализација“, потврди денеска министерот за внатрешни работи Оливер Спасовски.
„Сите факти се доставени до Јавното обвинителство и се што ќе се утврди за овој случај ќе се процесуира понатаму“, кажа Оливер Спасовски во одговор на пратеничко прашање на денешната собраниска седница посветена на пратенички прашања.
Тој нагласи дека МВР веќе има отворено оперативна акција за контрола на звучни и светлосни сигнализации и за затемнување на прозорци за оние кои немаат право на тоа, која трае веќе неколку години.
„Факт е дека најголемите мангупи во сообраќајот се токму носителите на функции не бирајќи ни политички партии нити функции ниту, пак, било што друго. Првите флешери ќе ги видите ако влезете во Белата палата, но постојат и во другите политички партии. Апелирам сите заедно како политичари да бидеме пример за луѓето и пример за одговорност“, потенцира Оливер Спасовски.
Посочи дека на сите министри во Владата им е укажано кој има право да користи светлосни и звучни сигнализации и додаде дека тоа може да го користат само тие кои се обезбедуваат и се во придружба со полиција.
„Ниту еден друг не смее да има вакви светлосни и звучни сигнализации во своите возила“, нагласи Оливер Спасовски.
Државниот јавен обвинител Љубомир Јовески, пак, посочи дека обвинителството уште истиот ден излезе на увид и ги фиксира трагите кај опожарениот автомобил и додаде дека детално и целосно ги испитува случувањата во врска со овој настан.
„Сите околности и факти се документираат и анализираат и доколку се утврдат елементи на кривично дело Обвинителството ќе преземе сите соодветни мерки“, кажа Љубомир Јовески во одговор на пратеничко прашање.
Појасни дека истрага се покренува против конкретно лице.
„Кога ќе бидат собрани доволно податоци во однос на кривичното дело и во однос на евентуален сторител на кривично дело тогаш Обвинителството ќе отвори соодветна истрага. Не само во врска со опожареното возило, туку Обвинителството собира податоци во овој случај и во делот на купувањето на хотелот“, кажа Љубомир Јовески.
Истакна дека воопшто не го секираат заканите кон него како јавен обвинител што се истакнуваат денеска и во други прилики зашто одговорно ја извршува функцијата.
„Јас сум задоволен од тоа како се одвиваат состојбите во Обвинителството. Обвинителството заедно со другите истражни органи и со полицијата ги презема соодветните мерки во однос на утврдување на околностите и фактите врз основа на кои се случени овие незгоди. Истрагата не се спроведува во првиот момент, туку за таа да се спроведе неопходно е да се утврдат докази, елементи на сторено кривично дело и да се утврди сторителот“, вели Љубомир Јовески и додаде дека претходно се утврдува дали е случен кривичен настан и евентуален конкретен сторител.
За довербата во Јавното обвинителство рече дека е само перцепција и додаде дека таа на некој начин е неповолна за Обвинителството, но и за Собранието. Затоа ги повика пратениците да го поддржат Обвинителството во делот на справување со вакви ситуации.
Прашан од пратеникот Драган Ковачки од ВМРО-ДПМНЕ кога ќе поднесе оставка, Љубомир Јовески кажа дека може да го извести дека нема да му го овозможи тоа задоволство.