Обединетите нации денеска ја повикаа меѓународната заедница одлучно да се придвижи во насока кон решение со две држави на палестинско-израелскиот конфликт, предлагајќи Ерусалим да биде главен град на двете држави.
– Одамна е поминато време решително, неповратно да се тргне по патот кон решение со две држави, засновано на резолуцијата на Обединетите нации и меѓународното право, рече генералната директорка на канцеларијата на ОН во Женева, Татјана Валоваја, цитирајќи ја изјавата на генералниот секретар на ОН Антонио Гутереш. Според Валоваја, тоа би значело дека Израел и Палестина да живеат рамо до рамо во мир и безбедност, со Ерусалим како главен град на двете држави.
Денешниот повик, кој се совпадна со Меѓународниот ден на солидарноста со палестинскиот народ, кој ОН го одбележуваат секоја година, го одразува моделот на две држави претходно одобрен од Генералното собрание на Светската организација, а вклучува поделба на Палестина на арапска и еврејска држава, и поделба на Ерусалим признаена со меѓународно право.
Договорот за две држави ќе создаде палестинска држава на Западниот Брег и Појасот Газа, покрај Израел. Израел бара палестинската држава да се демилитаризира за да не претставува закана за неговата безбедност. Палестинците сакаат источниот дел на Ерусалим, вклучувајќи го и стариот дел од градот каде што се наоѓаат муслиманските, еврејските и христијанските светилишта, да стане нивна престолнина, додека Израел смета дека Ерусалим треба да остане негов „неделив и вечен“ главен град.
Палестинскиот амбасадор во ОН во Женева, Ибрахим Краиши, рече дека сегашниот конфликт во Газа послужил како повик за будење за меѓународната заедница да го поддржи моделот на две држави.
Повиците за решение со две држави се зголемија по нападот на Израел на 7 октомври, кога вооружени лица на Хамас убија 1.200 луѓе и зедоа 240 заложници, по што Израел почна копнена и воздушна офанзива на Појасот Газа во која загинаа илјадници Палестинци