Српскиот претседател Александар Вучиќ изјави дека некои светски лидери тајно одржуваат контакти со рускиот претседател Владимир Путин, иако тоа јавно не го признаваат. Во интервју за блогерот Марио Науфал, Вучиќ изјави дека тој лично не се сретнал со Путин три години, но дека знае за најмалку двајца лидери кои тоа го правеле во тајност.
-Три години го немам видено Путин. И многу од нив разговарале со него тајно, а познавам најмалку двајца светски лидери кои го направиле тоа – изјави Вучиќ.
Прва средба со Путин по повеќе од три години
Вучиќ најави дека ќе се сретне со претседателот на Русија на 9 мај во Москва , што ќе биде нивна прва директна средба по три и пол години.
– На 9 мај ќе го видам за прв пат по три и пол години. Тоа покажува дека сме многу искрени, искрени и доследни на нашите зборови. Ние го правиме тоа што го кажуваме, што не е секогаш случај со другите – рече претседателот на Србија.
Информацијата за претстојната средба на лидерите во Москва претходно ја потврди и Максим Орешкин, заменик-шефот на кабинетот на рускиот претседател, наведувајќи дека средбата ќе се одржи за време на одбележувањето на 80-годишнината од Денот на победата.
Вучиќ на 7 март во телефонски разговор со Путин потврди дека ќе присуствува на јубилејните прослави, како и дека Србија ќе испрати припадници на армијата на воената парада во Москва.