Случајот кој ја потресе и обви во црно Македонија доби конечна завршница. Вечерва на вонредна прес-конференција, министерот за внатрешни работи, Оливер Спасовски, соопшти на јавноста дека првоосомничениот како што кажа тој „монструм“ е фатен на територија на Република Турција.
Оливер Спасовски одговараше на многу прашања од новинарите, но еден негов одговор е доста интересен за јавноста во Македонија. Имено, министерот откри дека Љупчо Палевски наводно имал информатор од редовите на МВР, поради што, по добиена информација тој одлучил да побегне од државата по двете грозоморни убиства.
„Несомнено е дека некој од полицијата дал информации за убиството на Вања Ѓорчевска и Панче Жежовски, па врз основа на тоа осомничениот организатор и спроведувач Љупчо Палевски – Палчо побегнал од Македонија“, изјави Оливер Спасовски.
Како што понатаму одговараше на прашањата, министерот откри дека телефонот на Вања Ѓорчевска бил пронајден, но не прецизираше каде.
„Телефонот е пронајден“, кусо одговори Оливер Спасовски.
Осомничениот Палчо, по кого беше распишана меѓународна потерница, контактирал со лица во Македонија додека бил во бегство. Како што објасни министерот, тој имал помош за превоз до Белград, потоа до Бугарија и на крајот до Турција, каде што е уапсен на улица во градот Баликесир.
За потсетување, „Во Центар“ ексклузивно и први во државата објавивме за тоа каде престојувал Љупчо Палевски – Палчо во Белград и со каков автомобил го напуштил главниот град на Србија и побегнал кон Бугарија, а подоцна и во Турција.
Оливер Спасовски додаде дека на Палчо му е одредена мерка притвор во отсуство, односно додека не биде испорачан во Македонија.