Претседателот на Панама, Хозе Раул Мулино, отфрли какви било преговори со САД за Панамскиот канал, откако американскиот претседател Доналд Трамп за време на неговата инаугурација минатата недела објави дека САД ќе го вратат водениот пат под своја контрола.
„Не можам да преговарам, а уште помалку да започнам преговори за каналот. Тој е запечатен. Каналот е панамски“, рече Мулино на својата неделна прес-конференција. Претседателот се обрати до јавноста во врска со претстојното патување на новиот американски државен секретар Марко Рубио во Централна Америка.
Минатата недела, портпаролката на САД го потврди патувањето, но не прецизираше поединечни земји што Рубио ќе ги посети на својата прва странска турнеја. Според американските медиуми, планирани се застанувања во Панама, Гватемала, Ел Салвадор, Костарика и Доминиканската Република, почнувајќи од крајот на оваа недела.
Во своето инаугуративно обраќање на 20 јануари, Трамп положи право на Панамскиот канал. Оттогаш, тој во неколку наврати отворено изјави дека САД треба да го контролираат овој важен воден пат, тврдења кои Мулино жестоко ги отфрли.
Каналот долг 82 километри го поврзува Атлантикот со Пацификот во Централна Америка. Изграден е на почетокот на 20 век од инженерскиот корпус на американската армија. На 31 декември 1999 година, САД ѝ ја предадоа контролата на каналот на Панама. Трансакцијата ја договорил неодамна починатиот демократски претседател на САД, Џими Картер.