Папата Франциско ќе му подари на британскиот крал Чарлс III фрагменти од Христовиот крунисувачки крст, кои треба да се носат на чело на поворката.
Станува збор за две парчиња дрво, долги пет и 10 милиметри, за кои се вели дека се извадени од крстот на кој бил распнат Исус, пишува Тајмс. Како што е наведено, Ватикан верува дека тоа се автентични делови од „вистинскиот крст“ кој бил користен за време на распнувањето на Исус пред портите на Ерусалим пред повеќе од 2.000 години. Фрагменти од тој крст биле вградени во новоизработениот сребрен крст наречен „Крстот од Велс“, кој бил направен од рециклирани шипки од Кралската ковачница, монтиран на дрвен стап.
На крстот се напишани зборовите на свети Давид на велшки, преведени како: „Бидете радосни, чувајте ја верата, правете ги малите нешта“. Англиканскиот архиепископ од Велс, Ендрју Џон, кој денеска ќе го благослови крстот во Ландудно, рече дека е воодушевен што делови од крстот ќе бидат користени на церемонијата на крунисување. Тој додаде дека тоа е симбол на наклонетоста на кралот кон Велс и дека „исклучително значајниот“ папски подарок покажува дека кралот „уживал на наклоноста на Ватикан“ и дека имал „многу добри односи“ со папата Франциско.
„Тоа е исклучително значајно. Извонредна работа е што кралот успеа да ја добие наклоноста на Ватикан и како резултат на тој многу добар однос, папата Франциско се согласи да ги донира овие мали делови од светиот крст“, рече тој. Подарокот, наводно, доаѓа речиси 500 години откако папата Павле III го екскомуницирал англискиот крал Хенри Осми. Кралот Чарлс Трети се сретна со папата Франциско за прв пат во 2017 година и повторно во 2019 година.
За автентичноста на моштите од крстот на Исус се расправа со векови, поточно нема библиски извештаи за спасувањето на крстот од ридот на Голгота, но легендата вели дека го откопала Света Елена, мајка на римскиот император Константин I, за време на аџилак во Светата земја во 326 г. Црквите низ христијанскиот свет наскоро тврдеа дека ги поседуваат фрагментите, кои станаа центар на почитување и аџилак. По крунисувањето, крстот ќе биде пренесен низ англиканската и католичката црква во Велс.