Авион на авио-компанијата „Air Canada“ кој требал да лета од Торонто до Дубаи доцнел речиси шест часа откако патник ја отворил вратата од кабината и паднал на пистата додека авионот бил пред полетување.
Мажот се здобил со полесни повреди од падот и бил пренесен на лекување во локалната болница. Истрагата утврдила дека човекот бил во „кризна состојба“ кога се случил инцидентот, а подоцна бил уапсен од полицијата.
Портпаролот на меѓународниот аеродром во Торонто изјавил дека аеродромските власти биле предупредени за инцидентот во понеделникот вечерта и дека тесно соработуваат со авиокомпанијата и регионалната полиција.
Локалните медиуми објавија дека авионот се подготвувал да полета на меѓународниот аеродром во Торонто кога се случил инцидентот.
Од авиокомпанијата изјавиле за медиумите дека патникот се качил на летот „AC056“ – „нормално“, но наместо да се качи на своето место, отишол на спротивната страна од авионот и ја отворил вратата од кабината.
Како резултат на инцидентот, летот, кој требало да превезе 319 патници, бил одложен и полетал речиси шест часа по првобитното време на полетување, според податоците за следење на летот на „Air Canada“.