Претседателот Доналд Трамп планира да издаде извршна наредба со која ќе се укине Министерството за образование, пишува Wall Street Journal, повикувајќи се на извори запознаени со ситуацијата. Се очекува дека одлуката би можела да биде донесена уште денеска, додека Белата куќа и Министерството за образование не одговориле на барањата за коментар, пренесува Ројтерс.
Републиканците поддржуваат исклучување, противниците предупредуваат на последици
Трамп со години се залага за укинување на Министерството за образование, нарекувајќи го тоа „голема измама“. За време на неговиот прв мандат, тој предложи негово затворање, но Конгресот не реагираше.
Републиканската партија долго време се обидува да го намали буџетот и влијанието на одделот , а новата секретарка за образование Линда Мекмахон, која беше потврдена на функцијата во понеделникот, го поддржа планот на претседателот.
Сепак, противниците на укинувањето предупредуваат дека овој потег може сериозно да го загрози американскиот образовен систем. Критичарите тврдат дека одделот игра клучна улога во одржувањето на високите стандарди на јавното образование, додека републиканците, велат тие, се обидуваат да го зајакнат приватното образование.
„Итното затворање може да загрози десетици милијарди долари помош за училиштата и учениците “, предупредуваат противниците на одлуката.
Одделот за образование надгледува студентски заеми од 1,6 трилиони американски долари
Американското Министерство за образование надгледува околу 100.000 јавни и 34.000 приватни училишта, но најголем дел од средствата доаѓаат од државните и локалните буџети. Федералните средства се користат за:
- Грантови за ранливите училишта
- Поддршка за наставници на деца со посебни потреби
- Финансирање на уметнички програми
- Надгледување на студентски заеми од 1,6 трилиони американски долари
Трамп минатиот месец рече дека сака веднаш да го затвори одделот, но призна дека му е потребна поддршка од Конгресот и образовниот синдикат за да го стори тоа. Останува да се види дали овој контроверзен план ќе ја добие политичката поддршка потребна за реализација.