Зголемувањето на внесот на влакна во вашата исхрана е еден од најефикасните и најлесните начини за контрола на шеќерот во крвта, се согласуваат нутриционистите. Влакната го забавуваат варењето и апсорпцијата на гликозата, со што се спречуваат ненадејни флуктуации на нивото на шеќер и помагаат во одржувањето на стабилна енергија во текот на денот. Дополнително, диететските влакна помагаат во создавање чувство на ситост, регулирање на варењето на храната и одржување на здравјето на срцето.
За порталот „Eating Well“, нутриционистите ги издвоија петте најдобри намирници богати со растителни влакна што им ги препорачуваат на луѓето со дијабетес.
Наут
Наутот е идеална храна за секој што сака да внесе повеќе растителни влакна и протеини без да прави големи промени во исхраната. Половина чаша варен наут содржи околу 117 калории, шест грама протеини, 19 грама јаглехидрати и пет грама влакна. Токму комбинацијата од влакна и протеини го забавува варењето на храната, што спречува ненадеен скок на шеќерот во крвта.
Семе од чиа
Една лажица семе од чиа (околу 15 грама) содржи речиси пет грама влакна, заедно со два грама протеини и четири грама здрави масти. И покрај нивната мала количина, овие вкусни семиња имаат моќен ефект врз здравјето. Друга интересна студија покажа дека луѓето со дијабетес тип 2 и висок крвен притисок кои консумирале 40 грама семе од чиа дневно во текот на 12 недели имале значително понизок систолен крвен притисок од оние кои не ги консумирале, објавува „Eating Well“.
Едамаме
Незрелата, мека и слатка соја, позната како едамаме, содржи околу осум грама влакна и 18 грама протеини во една чаша варен грав. Оваа комбинација помага во забавување на варењето и придонесува за подобра контрола на нивото на шеќер. Можете да го послужите како ужина (само сварете го и додадете сол) или да го додадете во салати, чорби и чинии со житарки.
Малини
Освен што се вкусни, малините се и одличен извор на растителни влакна. Една чаша содржи осум грама влакна и само 64 калории. Истражувањата покажуваат дека консумирањето црвени малини може да ја подобри чувствителноста на инсулин и да помогне во подобра регулација на гликозата, иако потребни се понатамошни истражувања.
Авокадо
Авокадото е познато по високата содржина на незаситени масти, но често се заборава дека е и одличен извор на растителни влакна. Половина авокадо содржи околу седум грама влакна и 15 грама здрави масти, што е една третина од препорачаниот дневен внес на влакна за жени и речиси една четвртина за мажи.
Благодарение на бавното варење, авокадото помага во одржувањето на стабилни нивоа на шеќер во крвта и придонесува за здравјето на срцето со намалување на лошиот (LDL) и зголемување на добриот (HDL) холестерол.