„Само што и’ се јавив на мајката на Рос Вилијам Улбрихт за да и’ кажам дека, во чест на неа и на Либертаријанското движење кое толку силно ме поддржуваше, ми беше задоволство што штотуку потпишав целосно и безусловно помилување за нејзиниот син Рос“, објави Трамп на Truth Social.
„Олошите што работеа да го осудат беа некои од истите лудаци кои беа вклучени во нападот на владата врз мене“. Тој беше осуден на две доживотни затворски казни плус 40 години. Смешно!“
Улбрихт беше уапсен во 2013 година и осуден во 2015 година за создавање и водење на пазарот на темни мрежи „Патот на свилата“. Во тоа време, неговиот сајт беше еден од првите и најголемите пазари за купување и продавање наркотици, купување и продавање лажни пасоши и возачки дозволи, ангажирање атентатори, хакери, продажба на разни нелегални производи и услуги, а сето тоа се плаќа во Биткоин. Улбрихт ја водеше страницата под псевдонимот „Dread Pirate Roberts“.
Улбрихт, кој сега има 40 години, беше прогласен за виновен за заговор за трговија со дрога, перење пари и компјутерско хакирање.
Платформата на Улбрихт ја користеа повеќе од 100.000 корисници за купување и продавање на дрога и други нелегални стоки и услуги, вредни повеќе од 200 милиони долари.
Во 2015 година, американското обвинителство, во завршниот збор на судењето, го нарече Улбрихт дилер на дрога и криминален профитер, кој ги искористил зависностите на луѓето и придонел за смртта на најмалку шест млади луѓе. Обвинителството го обвини Улбрихт дека управувал со империја вредна 1,2 милијарди долари од 2011 до 2013 година, и тоа само со помош на лаптоп и интернет.
Тоа судење привлече големо внимание во јавноста, а неговите поддржувачи ја започнаа кампањата „Ослободете го Рос“. На изрекувањето на пресудата, Улбрихт нагласи дека сака „да ги овласти луѓето да носат одлуки во нивните животи и да имаат приватност и анонимност“. Неговите поддржувачи тврдеа дека казната што му беше изречена е непропорционална со неговите дела.
„Њујорк пост“ пишува дека предизборното ветување на Трамп задоволило многу либертаријанци, кои се залагаат за ослободување на Улбрихт, кој го сметаат за пионер на слободниот пазар.