Кралскиот двор на Саудиска Арабија објави дека големиот муфтија на кралството, Абдулазиз бин Абдула Ал Шеик, починал на 82-годишна возраст.
Кралот Салман бин Абдулазиз наредил погребните молитви во отсуство (Салат ал-Гаиб) да се извршуваат за Ал Шеик во Големата џамија во Мека, џамијата на Пророкот во Медина, како и во џамиите низ целото Кралство, по аср молитвата. Според официјалните најави, погребната молитва ќе се изврши денес во џамијата Имам Турки бин Абдула во Ријад по аср молитвата.
Абдулазиз Ал Шеик служел како голем муфтија на Саудиска Арабија, бил претседател на Советот на врховни научници и претседател на Генералната администрација за исламски истражувања и фатви, со ранг на министер. Тој бил третиот голем муфтија на Саудиска Арабија, по Мухамед бин Ибрахим Ал Шеик и Абдулазиз бин Баз.
Роден е на 30 ноември 1943 година во Мека. Го загубил татко си во 1951 година, пред да наполни осум години, и пораснал како сирак. Во младоста го научил напамет Куранот, а во дваесеттите години целосно го изгубил видот. Студирал шеријат, бил член на академски совети на универзитети, имам и проповедник во џамијата Имам Турки бин Абдула во Ријад и истакнат проповедник на Арафат во џамијата Нимра.
Шеикот Ал Шеих е автор на бројни дела од областа на шеријатот, вклучувајќи збирки фетви, дела за исламската акида и текстови за прашањата за тоа што е дозволено, а што е забрането (халал и харам). Неговата научна работа вклучува и збирки фетви изречени за време на разни програми и пригоди во неговата долга кариера.