– Непалскиот премиер Пушпа Камал Дахал денеска доби доверба во парламентот, откако ја обезбеди поддршката на опозиционата центристичка Непалска конгресна партија и други помали партии кои се очекува да се приклучат на неговата нова влада.
За негова поддршка гласаа 172 пратеници во Претставничкиот дом, а 89 беа против, соопшти претседателот на Долниот дом на парламентот Деврај Гимир.
Претходните коалициски сојузници на Дахал ја напуштија владата минатиот месец, откако тој избра опозициски кандидат за следен претседател. Во Непал, на премиерите им се гласа доверба кога некој сојузник ќе ја повлече поддршката.
Дахал се очекува да објави коалиција оваа недела во која ќе биде вклучен Непалскиот конгрес и девет други формации, вклучително и неговата Обединета комунистичка партија на Непал (маоистичка).