Додека Запад сè повеќе ја критикува Унгарија за финансирање на војната во Украина бидејќи не поддржува санкции против Русија, нафтениот гигант „Гаспром“ објави дека Унгарија планира да купи поголеми количини руски гас од Москва оваа зима, пишува угледниот весник Politico.
Извршниот директор на „Гаспром“, Алексеј Милер, објави дека на унгарскиот пазар пристигнуваат прилично поголеми количини гас. Тој додаде дека оваа година на Унгарија веќе и се испорачани 1,3 милијарди кубни метри гас, покрај постојните договори.
Името на Алексеј Милер е на списокот на санкционирани лица од САД и Велика Британија поради неговата поддршка за војната во Украина.
Премиерот на Унгарија, Виктор Орбан, разговараше со претседателот на Русија, Владимир Путин, во Пекинг минатата недела и разговараа за испорака на гас и нафта, како и за снабдување со нуклеарно гориво. Виктор Орбан претходно изјави дека Будимпешта нема да дозволи санкции кои дополнително ќе ја зголемат инфлацијата во Унгарија и порача дека нема да поддржи построги санкции на ниво на ЕУ.
Дејвид Пресман, американскиот амбасадор во Унгарија, ја нарече средбата Виктор Орбан – Владимир Путин „загрижувачка“ и кажа дека сега има потреба да се разговара за продлабочените односи меѓу Будимпешта и Москва.
Во објавата на социјалната мрежа X (Твитер), Дејвид Пресман вели дека унгарскиот премиер одлучил да застане на страната на човекот чии сили се одговорни за злосторствата против човештвото во Украина.
„Додека Русија напаѓа цивили, Унгарија потпишува деловни аранжмани“, вели тој.
Главниот политички помошник на Виктор Орбан, Балаш Орбан, ги отфрли американските критики, велејќи дека на Унгарија и е „ситна“ од „лицемерието“ на американскиот амбасадор.
Министерството за надворешни работи на Унгарија одби да ја потврди или коментира најавата на „Гаспром“, а операторот на централата изјави за Politico дека претставниците на надворешната политика уживаат во продолжениот викенд за Денот на Републиката, кој го одбележува бунтот против советската репресија и либерализацијата на општеството од времето на комунизмот во 1956 година.
Во април, Олег Устенко, економски советник на украинскиот претседател Володимир Зеленски, кажа дека низата нови договори меѓу Унгарија и Русија ја направија земјата-членка на ЕУ соучесник во украинскиот конфликт.
„Мора да си целосно слеп за да не видиш какви злосторства спонзорираш. Купувањето дополнителен гас од Русите значи дека им давате поголем капацитет за ескалација на војната“, изјави тој тогаш за Politico.
„Безбедноста на енергетското снабдување на Унгарија бара непречен транспорт на гас, нафта и нуклеарно гориво“, порача првиот човек на унгарската дипломатија, Петер Сијарто, по потпишувањето на договорот на почетокот на годинава што му овозможи на „Гаспром“ да продава дополнителни резерви во земјата.
„За да се исполнат овие три услови, унгарско-руската енергетска соработка мора да биде непрекината. Тоа нема никаква врска со политичките преференции“, посочи тој.
Да потсетиме, минатиот вторник Виктор Орбан имаше билатерална средба со Владимир Путин на маргините на форумот „Појас и пат“ во Пекинг. Тој е единствениот лидер на земја-членка на Европската унија што присуствуваше на форумот или се сретна со Владимир Путин откако Русија ја нападна Украина на 24. февруари 2022 година.
Виктор Орбан му рекол на Владимир Путин за време на нивната средба во Пекинг дека Унгарија никогаш не сакала да се спротивстави на Русија и дека се обидува да ги спаси билатералните контакти.
По состанокот на Виктор Орбан, амбасадорите на земјите од НАТО и Шведска се собраа во Будимпешта за да разговараат за загриженоста за растечкиот пристап на Унгарија кон Москва.