Поранешниот претседател Џозеф Бајден треба да присуствува на погребот на папата Франциско в сабота во Ватикан, според повеќе извори запознаени со неговите планови, објави Си-Би-Ес Њуз.
Џозеф Бајден одржува блиски работни и лични односи со папата Франциско уште од посетата на починатиот папа на САД во 2015 година, потсетува порталот.
„Иако конечните детали сè уште не се утврдени, Бајден има намера да присуствува “, велат изворите.
Папата Франциско го започна својот понтификат во 2013 година за време на администрацијата на Барак Обама, но поранешниот американски претседател не планира да присуствува на погребот, изјави неговиот портпарол.
Претседателот Доналд Трамп и првата дама на САД Меланија Трамп денеска треба да летаат за Рим на погребот во сабота .
Папата Франциско , кој со месеци се бореше со здравствени проблеми, почина во понеделникот на 89-годишна возраст по мозочен удар .
Од средата, ковчегот со неговото тело е изложен во базиликата Свети Петар , каде десетици илјади ожалостени дојдоа да му оддадат последна почит.
Меѓу шефовите на држави кои ќе присуствуваат на погребот, како што е најавено, ќе бидат и украинскиот претседател Володимир Зеленски , францускиот претседател Емануел Макрон , италијанскиот премиер Џорџија Мелони , британскиот премиер Кир Стармер и аргентинскиот претседател Хавиер Миле .
Службата за протокол на Државниот секретаријат на Ватикан вчера соопшти дека досега 130 делегации потврдиле дека ќе присуствуваат на погребот на папата Франциско во сабота.
Меѓу присутните делегации ќе бидат околу 50 шефови на држави и 10 владејачки монарси, се наведува во соопштението, пренесе Анса.