За љубовта никогаш поотворено не се зборувало, а според сите најнови истражувања стапката на осаменост никогаш не била поголема. Покрај традиционалните начини да запознаеме некого, сè повеќе прибегнуваме кон помодерни, кои ни ги носи дигиталната технологија.
Зошто е толку тешко да се најде сродна душа, одговара Дуња Илиќ, психолог.
– Повеќето апликации за запознавање не се направени за да ја најдат вистинската личност . Тоа значи дека ќе го избришете профилот во моментот кога ќе го најдете. Каква корист добиваат луѓето од тоа? Тие се направени за да можете да продолжите да ги користите и да бидете свесни дека секогаш ве чекаат повеќе алтернативи и избори. Корисни се, бидејќи ви дозволуваат да запознаете луѓе на кои инаку би можеле само доколку сте физички присутни некаде, а секогаш е побезболно и бара помала храброст да им пристапите преку порака отколку лично. Но, треба да бидете свесни дека суптилно ни кажуваат дека „СЕКОГАШ ИМА ПОДОБРО“ – ако личноста со која кликнавте не се поклопува апсолутно во секој аспект – вратете се назад и „повлечете“ понатаму. За врска се потребни двајца, како што не би сакале некој да не одбие поради ситница, не е во ред и ние да го правиме истото.
Затоа е важно преку искуство да научиме кои се вредностите и особините што сакаме да ги поседува нашиот партнер?
– Кои мора, кои би било пожелно да ги има, но во ред е ако ги нема? Што апсолутно никогаш не би можеле да го преболиме? Овие прашања веќе даваат одговори и насоки за иднината. Исто така, важно е да се погледне и начинот на живот на тој потенцијален партнер. Дали е тој некој што претпочита да биде опкружен со луѓе или ужива во осаменоста? Кои се неговите хоби? Како изгледа неговиот типичен ден. Ако во многу нешта се разликува од нашата – со текот на времето ќе има несогласувања кои ќе бидат непремостливи.
Кои лекции треба да ги научиме за да ја најдеме нашата сродна душа?
– Обидете се да извлечете поука од секоја врска. Запрашајте се, дали само партнерот беше одговорен за крајот? Што згрешив? Зошто ја избрав таа личност? Ако не работиме на самосвест и брзаме од врска во врска, истите партнери ќе ги повторуваме само со различно презиме. Нашите избори не се случајни и честопати се обид да ја повториме љубовта што ја добивме од нашите родители. Дури и кога ќе пораснеме во семејство каде што не сме опсипани со љубов, најголемата хемија ќе ја чувствуваме токму со оние партнери кои ја повторуваат истата динамика во односите. Ако нашите родители беа ладни, ќе нè привлекуваат такви, емотивно недостапни партнери и ќе ги правиме овие грешки додека не го сфатиме тоа и не научиме да се цениме себеси за да знаеме дека заслужуваме повеќе.