Емоционалната интелигенција сè повеќе се препознава како клучна особина за квалитетни врски, успех на работа и личен развој. Иако може да се манифестира на многу начини, станува збор за способност за регулирање на сопствените емоции, самосвест и емпатија кон другите. Емоционално интелигентните луѓе не само што знаат како да ги препознаат и обработуваат сопствените чувства, туку и создаваат безбеден простор за другите луѓе.
Според студија објавена во списанието BMC Psychology, токму оваа внатрешна свест и надворешна чувствителност придонесуваат за поздрава и поотворена комуникација. Сепак, експертите истакнуваат дека емоционално интелигентните луѓе свесно избегнуваат одредени фрази што можат да ги оштетат врските и довербата.
„Претеруваш“
Психологот Џефри Бернштајн предупредува дека фрази како „претеруваш“ често се користат како алатка за емоционална манипулација, позната и како гаслајтинг. Ваквите изјави можат да предизвикаат соговорникот да се сомнева во сопствените емоции и да се чувствува засрамено. Емоционално интелигентните луѓе се свесни за ова и затоа, наместо да ги минимизираат чувствата на другите луѓе, тие се стремат да создадат простор во кој секој може да се изрази без страв од осуда, пишува YourTango.
„Едноставно таков сум“
Емоционално интелигентните луѓе избегнуваат изјави како „таков сум јас“ бидејќи веруваат во можноста за промена и личен раст. Преземањето одговорност за сопственото однесување, дури и кога е непријатно или тешко, покажува самодисциплина и отпорност. Таквите луѓе ја гледаат пошироката слика и се подготвени да се променат за да придонесат за поздрави односи – без разлика дали на работа или во нивниот личен живот.
„Звучиш лудо“
Психологот д-р Кортни Ворен истакнува дека оваа фраза е уште една форма на манипулација бидејќи ги намалува чувствата и искуствата на другата личност. Ваквите изјави ги охрабруваат луѓето да ги потиснуваат своите емоции, особено ако веќе имаат ниска самодоверба. Емоционално интелигентните луѓе никогаш не создаваат таков притисок, туку им дозволуваат на другите да се изразат дури и кога чувствата се интензивни или тешки за разбирање.
Внимателниот и почитувачкиот избор на зборови не само што ги зајакнува односите, туку покажува и вистинска емоционална зрелост и грижа за другите.