Поранешниот руски министер за транспорт Роман Старовоит (53) беше пронајден мртов во семејната куќа во селото Мјакино, Одинцовскиот округ, Московска област, само неколку часа откако беше разрешен од функцијата од страна на претседателот на Русија, Владимир Путин.
Според руските медиуми, Старовоит наводно извршил самоубиство со употреба на огнено оружје. Пиштолот бил пронајден во непосредна близина на неговото тело. Според информациите, истиот пиштол му бил даден од раководството на Министерството за внатрешни работи уште во 2023 година.
Кремљ не ги објави причините за разрешувањето на Старовоит, а портпаролот на претседателот Дмитриј Песков одби да коментира за случајот.
Неговиот заменик Андреј Никитин, кој до февруари оваа година беше гувернер на Новгородската област, беше привремено назначен на негово место.
Разрешувањето на Старовоит доаѓа во време на сериозни прекини во рускиот воздушен сообраќај. Во текот на изминатиот викенд и почетокот на неделата, откажани се 485 летови, додека 1.900 се одложени. Најпогодени беа аеродромот Шереметјево во Москва и аеродромот Пулково во Санкт Петербург, каде што утрово беа блокирани околу 7.000 патници.
Прекинот на летовите следеше по нападите со украински беспилотни летала, кои наводно погодија неколку руски аеродроми, вклучувајќи ги и оние во западна и централна Русија, како и во Сибир.
„Нападите со украински беспилотни летала врз руските аеродроми имаат за цел да ја нарушат воздушната логистика“, според каналот „Кремлињ шепот“ на Телеграм.
„Нарушувања во распоредот, доцнења на стотици летови, прекин на работата на пет аеродроми – сето ова станува не само тактичка, туку и стратешка акција насочена кон потресување на вообичаениот ритам на животот и покажување на ранливоста на системот.“
Руските авиокомпании се соочуваат со сериозни последици: околу 43.000 патници добија поврат на парите, додека на 94.000 им беше обезбеден хотелски сместување. Вкупната штета се проценува на околу 186 милиони фунти, а се очекува бројката да продолжи да расте.