Рускиот претседател Владимир Путин потпиша указ за одобрување на промена на нуклеарната доктрина на Москва.
Ажурираната доктрина вели дека рускиот нуклеарен напад може да биде оправдан дури и ако следи „агресија врз Русија и нејзините сојузници од која било земја што не поседува нуклеарно оружје и е поддржана од држава што поседува“.
Исто така, според новата нуклеарна доктрина, Русија може да го користи својот атомски арсенал во случај на голем воздушен напад со ненуклеарно оружје, вклучително и беспилотни летала.
Путин го потпиша указот за 1.000-тиот ден од војната меѓу Русија и Украина, кој се слави денеска.
Потпишувањето уследи и по одлуката на Џо Бајден, претседателот на САД во заминување, да и’ дозволи на Украина да користи американски ракети со долг дострел АТАКМС за напади во Русија, што предизвика страв од избувнување на Третата светска војна.
На крајот на септември оваа година, Путин го предупреди Западот дека Русија може да користи нуклеарно оружје во случај нејзината територија да биде погодена од конвенционално, не само атомско оружје, и дека Москва ќе реагира на ист начин во случај Белорусија да биде нападнат.
Во обраќањето пред Советот за безбедност на Руската Федерација, тој рече дека работата за промена на националната нуклеарна доктрина се одвивала во текот на изминатата година.
Путин рече дека Москва ќе размисли за напад дури и ако земја што нема атомско оружје нападне руска територија, ако има поддршка од нуклеарна сила, бидејќи во тој случај тоа ќе се смета за заеднички удар на тие земји.
Овде Путин очигледно мислеше на Украина.
Ројтерс тогаш рече дека одлуката на Кремљ да ја промени својата официјална нуклеарна доктрина е одговор на тоа што САД и Велика Британија размислуваат дали да му дозволат на Киев да користи ракети добиени од западните земји за да изврши напади во Русија.
– Нуклеарната тријада останува најважната гаранција за обезбедување на безбедноста на нашата земја и граѓаните, таа е инструмент кој го одржува стратешкиот паритет и рамнотежата на силите во светот – изјави Путин пред два месеци.
Тој рече дека Русија ќе употреби нуклеарно оружје „откако ќе добие веродостојни информации за масовно лансирање воздушни напади и минување на нивните стратешки или тактички авиони, крстаречки ракети, беспилотни летала, хиперсонични и други авиони над нашата граница“.