Разузнавачи предупредуваат дека Израел ќе го нападне Иран до јуни 2025

Американските разузнавачи предупредуваат дека Израел најверојатно ќе изврши превентивен напад врз локациите на иранската нуклеарна програма до средината на оваа година, објави Вашингтон пост, повикувајќи се на повеќе разузнавачки извештаи.

Весникот наведува дека таков напад „ќе ја уназади иранската нуклеарна програма“, повикувајќи се на разузнавачки информации собрани во периодот на транзиција меѓу администрациите на Џозеф Бајден и Доналд Трамп.

Разузнавачките извештаи предвидуваат два потенцијални израелски напади врз Иран, кои би вклучиле обезбедување на американската поддршка за полнење гориво, како и разузнавачки информации, пишува весникот.

Израелската влада, ЦИА, американската одбранбена разузнавачка агенција и Канцеларијата на директорот на националното разузнавање одбија да ги коментираат информациите, додека портпаролот на Белата куќа за национална безбедност Брајан Хјуз изјави за ВП дека американскиот претседател Доналд Трамп „нема да дозволи Иран да добие нуклеарно оружје“.

Трамп неодамна во интервју за Фокс њуз изјави дека повеќе би сакал да склучи договор со Иран за да го спречи Техеран да развие нуклеарно оружје, наведувајќи дека исто така верува дека Иран претпочита договор отколку вооружен конфликт.

„Сите мислат дека Израел, со наша помош или наше одобрение, ќе го бомбардира Иран. Јас повеќе би сакал тоа да не се случи“, рече Трамп.

Иран и Израел извршија неколку напади едни на други во текот на изминатата година во услови на пошироки тензии околу војната во Појасот Газа.