Претседателот на Турција, Реџеп Таип Ердоган, изјави дека не се согласува со негативниот пристап на другите светски лидери кон претседателот на Русија, Владимир Путин, објавија во четвртокот турските телевизиски станици.
Говорејќи пред новинарите во Њујорк по учеството на Генералното собрание на ОН, Реџеп Таип Ердоган порача дека Русија не е земја што може да се игнорира и повтори дека се надева дека може да се најде решение за обновување на договорот за извоз на украинско жито преку Црното Море, договор кој официјална Москва ја напушти во јули.
„И претседателите и премиерите имаат негативен став кон Владимир Путин. Се разбира, ние не го делиме ниту го изразуваме тоа гледиште. Исто така, верувам дека овие пристапи не се точни бидејќи Русија не е обична земја“, вели Реџеп Таип Ердоган.
„Без разлика дали според нејзината област или нејзината позиција во светот, Русија има јасно место. Во однос на производството на жито, Русија сега е меѓу ретките земји во светот. Не можете да игнорирате една таква земја“, потенцира тој.
Турција од почетокот на војната се обидува да има добри односи со Москва и Киев. Воено и помага на Украина и истакнува дека го поддржува нејзиниот територијален интегритет, но во принцип се противи на санкциите против Русија.