Армин Пејпергер, извршен директор на водечкиот германски производител на оружје „Рајнметал“, изјави дека Русија го планирала неговиот атентат поради незадоволството од западните испораки на оружје за Украина.
Неговата изјава доаѓа откако НАТО вчера официјално потврди дека Русија имала намера да го убие.
– Мислам дека е сосема јасно дека земјите како Русија не се задоволни што ние, како најголем светски производител на муниција од голем калибар, им помагаме на западните земји во одбраната на Украина, рече Пејпергер за време на неодамнешната посета на Литванија.
Според Џејмс Апатари, заменик помошник генерален секретар на НАТО за иновации, хибридни и сајбер закани, американското и германското разузнавање го спречило рускиот план, кој беше дел од пошироките напори на Кремљ за елиминирање на лидерите во одбранбената индустрија низ Европа.
Важна улога на „Рајнметал“
Рајнметал е клучен германски производител на артилериски гранати од 155 милиметри, кои станаа важно оружје во војната во Украина. Фирмата, исто така, гради објект за поправка на тенкови во Украина, што дополнително ја зголемува нејзината важност во тековниот конфликт.
Русија тврди дека не го планирала атентатот. Портпаролот на Кремљ, Дмитриј Песков, рече: „Ваквите вести не можат да се сфатат сериозно. Тоа се лажни вести“.
Пејпергер истакна дека полицијата е загрижена за неговата безбедност и се заблагодари на германската влада за преземените мерки за заштита. Тој додаде дека е свесен дека има луѓе кои не се задоволни од неговата работа, но дека е фокусиран да продолжи да ги поддржува западните земји во одбраната.
НАТО предупреди на континуирана и ескалирачка кампања на дестабилизација од страна на Русија против западните земји, вклучително и саботажа.