Руската воздушна одбрана уништи или пресретна повеќе од 100 украински дронови за три часа, вклучувајќи и рој дронови што се движеа кон Москва, соопшти руското Министерство за одбрана рано утрово.
Министерството преку апликацијата за пораки Телеграм објави дека инцидентите се случиле помеѓу 21 часот. и полноќ по московско време, наведувајќи бројка од 112 соборени дронови. 59 од нив беа соборени над регионот Брјанск на украинската граница, додека останатите беа пресретнати над пет различни региони.
Гувернерот на регионот Брјанск објави дека нема жртви, но рече дека во нападот се оштетени една куќа и шест автомобили. Во регионот Смоленск, во близина на полската граница, регионалниот гувернер изјави дека се соборени 11 беспилотни летала, а немало и жртви.
Градоначалникот на Москва, Сергеј Собјанин, во објава на Телеграм изјави дека 27 дронови биле соборени додека се движеле кон руската престолнина. Подоцна, тој број се зголеми на 33.
„Единиците за воздушна одбрана на Министерството за одбрана продолжуваат да ги одбиваат нападите на непријателските беспилотни летала“, напиша Собјанин.
Русија и Украина извршија голем број напади со беспилотни летала една врз друга во текот на изминатата недела, потсетува Ројтерс.
Украинскиот претседател Володимир Зеленски во понеделник изјави дека повеќе од 900 дронови биле лансирани кон украински цели во тридневен период, кој заврши во понеделник наутро.