– Руските сили синоќа спроведоа комбиниран воздушен напад врз украинскиот град Харков, при што употребија беспилотни летала „Шахед“ и ракети, соопштија денеска локалните власти.
Нападот предизвика повеќе пожари во индустриски и станбени зони, при што најмалку едно лице е повредено, информираше градоначалникот на Харков, Игор Терехов.
„Според новите информации, непријателот користел девет беспилотни летала од типот ‘Шахед’ и две засега неидентификувани ракети. Пожари избувнаа на четири локации во индустриската зона, а оштетена е и една приватна куќа“, напиша Терехов на Телеграм.
Шефот на регионалната воена администрација на Харков, Олег Синехубов, соопшти дека ракетен напад во Новобаварскиот Реон запалил цивилно претпријатие, оштетувајќи еднокатна индустриска зграда и повредувајќи 30-годишен маж.
Дополнително, напад со дрон предизвикал пожар во приватна куќа на површина од 100 квадратни метри, а друг пожар зафатил и автомобилска сервисна станица, проширувајќи се на 200 квадратни метри. Екипите на итната служба интервенирале на терен за да ги локализираат пожарите, додаде Синјехубов.
Претходно беа пријавени серија експлозии што се слушнаа низ градот за време на нападот.
Државната служба за итни случаи на Украина (ДСНС) потврди дека во Новобаварскиот Реон се запалиле објект за производство, магацин, сервисна станица и станбена зграда, при што едно лице било повредено.
Во селото Циркуни, во близина на Харков, целосно изгоре станбена зграда од 250 квадратни метри, но за среќа нема пријавени жртви.