Главното јавно обвинителство во Истанбул издаде налози за апсење на 16 осомничени во истрагата за „омраза и дискриминација“ и „поттикнување омраза и непријателство“ во јавноста.
Меѓу приведените е и актерот Џем Џигит Узумоглу, кој го играше Султанот Мехмед Освојувачот во документарната серија на Нетфликс, Rise of the Empire: Ottoman, објави Актерскиот сојуз.
Осомничените беа приведени поради објави на социјалните мрежи со кои се повикуваат луѓето да не трошат пари вчера, а продавниците и деловните субјекти да бидат затворени во знак на солидарност.
Народот на Турција протестира поради апсењето на градоначалникот на Истанбул, Екрем Имамоглу, кој е обвинет за корупција. Оние кои го поддржуваат тврдат дека апсењето е пресметка со него како главен противник на Ердоган на претседателските избори во 2028 година.
Владата инсистира на тоа дека судството е независно и дека нема политичко мешање.
Независната новинска агенција АНКА објави дека од апсењето на Имамоглу на 19 март, околу 2.000 лица се приведени, а 316 од нив се во затвор во очекување на судењето. Повеќето се соочуваат со обвиненија за учество во протестите.
Адвокатите на приведените демонстранти вчера изјавија дека голем дел од нив биле малтретирани во затвор. Владата не одговори на тие обвинувања, но денеска полицијата излезе со соопштение во кое ги демантираше тврдењата дека жените биле сексуално злоставувани во притвор, нарекувајќи го тоа „гнаса клевета“.