Трговскиот суфицит на Русија ќе надмине 330 милијарди долари профит во 2022 година, што го одразува скокот на извозот и високите цени на нафтата на светските берзи, покажаа во понеделникот податоците на царинската управа.
Минатата година рускиот извоз порасна за 20 отсто, на 591,5 милијарди долари. Увозот е намален за 12 отсто, на 259,1 милијарди долари.
Така, суфицитот во рускиот трговски биланс е за 68 отсто поголем од 2021 година, достигнувајќи 332,4 милијарди долари.
Благодарение на високите цени, руските приходи од продажба на сурова нафта и нафтени деривати скокнаа за 42 отсто минатата година, и покрај санкциите на Западот, кои пак го ограничија рускиот увоз.
За да ги ограничат приходите на Русија за финансирање на војната во Украина, Г-7 и нејзините партнери, вклучително и Европската унија, ја ограничија цената на руската нафта на 60 долари кон крајот на минатата година, заканувајќи им се на осигурениците и превозниците со санкции доколку носат поскапи барели.
Во февруари ги ограничија и цените на поскапите деривати на 100 долари, а на поевтините на 45 долари, што би требало да го намали рускиот приход оваа година.
Ценовната сопирачка веќе јасно се почувствува во првите два месеци од годинава, објави медиумската агенција dpa.
Во меѓувреме, рускиот увоз речиси се врати на предвоените нивоа, делумно поради „сивите“ испораки преку трети земји.