Формирањето на островите обично вклучува движење на огромни тектонски плочи во текот на векови, ако не и милениуми. Сепак, нов остров се појави во Алјаска за само четири децении!
Планинскиот врв Проу Ноб некогаш бил опкружен со дебел слој мраз од глечерот Алсек. Сепак, најновите сателитски снимки покажуваат дека сега е опкружен со вода и одделен од копното .
Глечер „жртва“ на климатските промени
Слика од Landsat 8 од август открива дека планинскиот врв повеќе не е поврзан со глечерот, додека експертите на НАСА веруваат дека тој станал остров помеѓу 13 јули и 6 август оваа година.
Покрај тоа, тие истакнуваат дека феноменот е последица на глобалните климатски промени, предизвикани од човековото дејствување, објавува „Дејли меил“.
„По должината на крајбрежната рамнина на југоисточна Алјаска, водата брзо го заменува мразот“, објасни Линдзи Дорман, стручен соработник на публикацијата „Обсерваторија за Земјата на НАСА“ .
На почетокот на 20 век, глечерот Алсек се протегал околу пет километри западно од денешниот остров. Најраните регистрирани набљудувања од 1894 година покажуваат дека тој ја покривал целата површина на денешното езеро Алсек.
Извештаите од 1907 година покажуваат дека глечерот е поврзан со нунатак (ескимско име за карпести маси), кој бил наречен Проу Ноб . Воздушните фотографии од крајот на 1960-тите покажуваат дека планинскиот врв бил опкружен со мраз од сите страни.
Остров во средината на никаде
Сепак, климата драстично се промени, а некогаш стабилниот глечер ослабна.
„ Глечерите во оваа област стануваат потенки и се повлекуваат, а се формираат езера од стопената вода“, додава Дорманова.
Во 1984 година, НАСА го фотографираше глечерот со сателитот „Лендсат 5“, откривајќи дека неговиот западен раб се трансформирал во езерски брег. Во текот на следните децении, тој се повлекувал уште повеќе, откривајќи сè поголем дел од планинскиот врв.
Помеѓу 2018 и денес, повлекувањето на глечерите почна брзо да се забрзува, оставајќи го Проу Ноб целосно опкружен со вода.
Новиот „езерски регион“ на Алјаска
Освен што создаде нов остров, оваа промена имаше и длабок ефект врз езерото Алсек. Од 1984 година, неговата површина се зголеми од 45 км² на 75 км². Но, ова не е изолиран случај.
Низ цела Алјаска и низ целиот свет, ледничките езера растат со алармантна брзина. Минатата година, глациологот Мори Пелто ја предупреди НАСА дека Алјаска брзо станува „нов езерски регион“.
Овие промени ги загрижуваат многу научници. Имено, ледничките езера можат да предизвикаат разорни поплави, бидејќи обично се опкружени со кревки природни насипи од карпи и мраз. Падот на овие „бариери“ може да ослободи бран вода и материјал со брзина од 30 до 100 км/ч, уништувајќи сè на својот пат.
Во студија објавена во 2024 година, научниците предупредуваат дека 10 милиони луѓе ширум светот се изложени на ризик од потенцијално разорни леднички поплави.