На климатскиот самит на Обединетите нации – COP28 – во Дубаи, беше постигнат значаен договор за фосилните горива. За прв пат владите се договорија за ова прашање.
Рано утринава, телото на ОН за климатски промени објави нов нацрт на конечниот договор со кој се повикуваат земјите да преминат од употреба на фосилни горива кон други видови извори на енергија оваа деценија, но не и постепено да ги укинуваат, како што повикаа многу земји на самитот.
Неизвесно е дали тоа ќе биде доволно за да се одобри договорот, објави Би-Би-Си.
На ниту еден претходен самит на ОН за климата, земјите не се договорија за начините за постепено укинување на употребата на нафта, гас и јаглен.
Сите 198 земји кои учествуваат во COP28 мора да се согласат за да се постигне договор.
Се повикуваат земјите да ги намалат емисиите на гасови
Согорувањето на фосилните горива води до глобално затоплување и досега владите никогаш колективно не се договориле да престанат да ги користат.
Нацрт-договорот ги повикува земјите да преземат акција за намалување на емисиите на стакленички гасови, вклучително и тројно зголемување на глобалниот капацитет за обновлива енергија и удвојување на просечната годишна стапка на подобрување на енергетската ефикасност во светот до 2030 година, објави Ројтерс.
Се повикува и на транзиција од фосилни горива во оваа деценија со цел целосно да се укине користењето на овој вид гориво до 2050 година.
Нацрт-договорот предвидува значително намалување на емисиите на метан до 2030 година, како и постепено укинување на субвенциите за фосилните горива.
Норвешкиот министер за клима и животна средина Еспен Барт Ејд рече дека е првпат светот да се обедини во јасна шема за потребата од транзиција од фосилни горива.
Рејчел Клетус, политички директор и главен економист за Програмата за клима и енергија на Унијата на загрижени научници, рече дека новиот нацрт-договор испраќа силен сигнал дека светските лидери го препознаваат наглото оддалечување од фосилните горива и кон чиста енергија оваа деценија суштински за постигнување климатски цели.