Севернокорејскиот лидер Ким Џонг-ун изјави дека Русија ќе „победи“ во својата борба против „империјалистите“, објави денеска државната новинска агенција КЦНА, во забелешки кои се сметаат за насочени кон Украина и нејзините западни поддржувачи, како што се САД.
Северна Кореја воспостави поблиски врски со Русија и ја поддржа Москва по инвазијата на Украина минатата година, вклучително и подоцнежното прогласување анексија на делови од Украина, кои повеќето членки на ОН ги осудија како незаконски.
„Ви испраќаме топли желби вам, на руската армија и на рускиот народ во вашата света борба за зачувување на светскиот мир“, ја цитира агенцијата пораката на Ким во писмото до рускиот претседател Владимир Путин.
Ким, исто така, му ја честита на Путин годишнината од Денот на победата, со кој се слави поразот на нацистичка Германија во 1945 година, нагласувајќи дека Русија ќе продолжи да ја штити својата „автономија“ и „стабилноста на регионот“.