Мразот од морето на Антарктикот падна на рекордно ниско ниво оваа година поради високите температури и нема брз лек за да се отстранат штетите, велат научниците оваа недела во студијата за влијанието на климатските промени на континентот.
Минималната ледена покривка на континентот минатата година падна под 2 милиони квадратни метри за прв пат од почетокот на мерењата на сателитите во 1978 година, а овој февруари падна на уште пониски нивоа, се вели во студијата објавена во списанието Frontiers in Environmental Science.
„Нема брзо решение“
„Ќе бидат потребни децении, ако не и векови, за овие работи да закрепнат. Не постои брз лек за замена на овој мраз“, вели Ана Хог, професорка на Универзитетот во Лидс и еден од коавторите на студијата. „Тоа сигурно ќе трае долго, ако воопшто е можно“, им нагласи таа на новинарите.
Овогодинешниот минимум мраз е за 20 отсто помал од просекот во 40 години, што е еквивалентно на загуба на морски мраз речиси 10 пати поголема од големината на Нов Зеланд, рече Тим Наиш, директор на Истражувачкиот центар за Антарктикот на Универзитетот Викторија во Велингтон во Нов Зеланд.
„Во некои случаи, се приближуваме до точките од кои нема враќање, кои штом еднаш ќе се поминат, ќе доведат до неповратни промени со незапирливи последици за идните генерации“, предупреди Наиш.
Глобалното затоплување го направи Антарктикот поранлив
Глобалното затоплување поттикнато од согорувањето на фосилните горива го направи Антарктикот поранлив на екстремни настани и тоа влијание е „речиси сигурно“ дека ќе се влоши, се вели во студијата.
Климатските промени „ќе доведат до зголемување на големината и фреквенцијата“ на топлотните бранови, колапсот на ледената покривка и намалувањето на морскиот мраз, се додава, врз основа на неодамнешните докази од научните студии за океанот на Антарктикот, атмосферата, криосферата и биосферата.
Точното влијание на климатските промени врз Антарктикот и околниот океан е неизвесно, а научниците се мачеа да измерат колку глобалното затоплување влијае на дебелината на мразот на Антарктикот.
Најголемото отстапување досега
Но, „научно разумно“ е да се претпостави од феномени како што е забрзаното намалување на морскиот мраз дека екстремните настани ќе се интензивираат со зголемувањето на температурите, рече Мартин Зигерт, глациолог од Универзитетот во Ексетер, друг автор на студијата.
Минатата година „атмосферска река“ од Австралија донесе суптропска топлина и влага на континентот, предизвикувајќи температури и до 38,5 степени над нормалата, што е најголемото отстапување досега.