Претседателот Доналд Трамп вчера им рече на инвеститорите дека, во екот на пазарните превирања предизвикани од неговото воведување на нови царини за целиот свет, сега е вистинското време да се инвестира во САД, а на социјалната мрежа „Truth“ ги коментираше и контрамерките на Кина, за кои рече дека се „лошо одиграни“.
„Кина одигра лошо. Нив ги фати паника – тоа е единственото нешто што не требаше да го направат“, рече Трамп.
Најавата на Трамп доаѓа неколку часа откако Кина објави царини од 34 отсто за целиот американски увоз, со дополнителни мерки против американските компании кои имаат бизнис со Тајван или претставуваат, тврди Пекинг, безбедносен ризик.
„За многуте инвеститори кои доаѓаат во Соединетите Држави и инвестираат огромни суми пари – моите политики никогаш нема да се променат. Ова е одлично време да се збогатите и побогатите од кога било досега!“, објави Трамп на платформата Truth Social.
Изјавата на Трамп доаѓа во време кога светските пазари се во пад поради ескалацијата на трговската војна меѓу САД и Кина, а клучните берзански индекси во Лондон, Франкфурт и Њујорк бележат значителни загуби.