Иако Охрид ги има Факултетот за туризам и средното гастрономско училиште, каде што се школуваат студенти и ученици за потребите на туристичкиот сектор, се покажува дека оваа рамка не е доволна за да ги задоволи потребите на локалните гастрономи. Последниве години интересот за упис во оваа гимназија опаѓа. Најголемата причина се ниските плати.
„Последниве години во една учебна година се пријавени 80 ученици. Не е доволен број за потребите на гастрономскиот и туристичкиот сектор. Се обидуваме да ја зголемиме таа бројка. Пречка е што од Охрид и Охридскиот регион се запишуваат мал број ученици во струката гастрономија и туризам со меѓусебна соработка со гастрономи, ресторани и туристички агенции“, изјави Марјан Радески – директор на средното гастрономско училиште, Охрид.
Радески вели дека со стипендии се обидуваат да привлечат повеќе студенти.
„Последниве години сме сведоци на големо заминување на работната сила, дури и учениците кои тука завршуваат средно образование заминуваат во други земји, главно во балканскиот регион, поточно во Хрватска. Од ова можеме да заклучиме дека одат на подобри плати и услови“, рече Марјан Радески – директор на средното гастрономско училиште, Охрид.
Додека во Струга и Охрид нема гастрономски објект каде што нема недостиг од работници на сите позиции.
„Имаме отворени конкурси и никој не се јавува. Не само ние, туку и денес нема хотел за кој не е потребен готвач, келнер, собарка, чистачка. Ова мора од некаде да се пополни“, изјави Кирсте Блажески – претседател на ХОТАМ.
Летово во близина на Охридското Езеро се очекува да работат над 1.000 граѓани на Непал, Филипини и Индија. Некои од нив веќе почнаа со работа.