„Трајниот мир во кој новите моќи на човековата наука и технологија ќе можат да се искористат за подигање на благосостојбата на човештвото на невидени височини е врвен заеднички интерес за чие постигнување и одржување мораме да понудиме нови перспективи“, рече претседателката на Северна Македонија, Гордана Силјановска Давкова, на денешното отворање на 12. Глобален форум во Баку.
Таа оцени дека Глобалниот форум во Баку стана една од најважните меѓународни платформи во последните години и се однесува на најважните регионални и глобални прашања. Ова, рече таа, е особено важно во оваа година за која некои очекуваат да биде пресвртница.
„Секој ден имаме сè повеќе прашања и сè помалку одговори. Светот станува многу поинакво место. Мултилатерализмот го отстапува местото на мултиполаризацијата. Растечкото геополитичко ривалство го слабее системот за колективна безбедност. Обединетите нации се маргинализирани кога тоа ни е најпотребно. Консензусот по Втората светска војна е доведен во прашање. Како да живееме на почеток на нова ера во која се поткопува меѓународниот систем заснован на правила“, рече Силјановска Давкова.
Таа потсети на неодамнешната изјава на германскиот претседател Штајнмаер на Минхенската безбедносна конференција дека „отсуството на правила не смее да стане водечки принцип на новиот светски поредок“, бидејќи тоа, според неа, би значело напуштање на нашето најважно цивилизациско достигнување дефинирано пред 80 години во Повелбата на Обединетите нации.
„Прашањето не е дали ќе имаме правила или не, туку кои ќе бидат тие правила и на што ќе се засноваат? Дали на принципот pacta sunt servanda или на принципот на моќ? Што ако, покрај судир на интереси, имаме и конфликт на вредности и реалности? Дали можеме да ги решиме најголемите кризи и предизвици на нашето време без заеднички правила? Каков свет ќе им оставиме на младите и на идните генерации? Ова се само дел од прашањата што ќе ги разгледаме на овогодинешниот Глобален форум во Баку“, рече Силјановска Давкова.
Таа цитираше дел од говорот на поранешниот американски државен секретар Кордел Хол кога му беше доделена Нобеловата награда за мир за неговата улога во основањето на ОН, во кој тој потсети дека главното прашање за луѓето и нациите е „дали тие страдале доволно и научиле доволно за да ги остават настрана сомнежите, предрасудите и краткорочните и тесни интереси и да се обединат во нивните најголеми интереси“.
На 12. Глобален форум во Баку, организиран од Меѓународниот центар „Низами Ганџави“, учествуваат околу 400 учесници – сегашни и поранешни шефови на држави и влади, претставници на меѓународни организации и граѓанско општество.