Собранието вчера, со 60 гласа „за“ и без гласови против и воздржани, во рамките на 60-тата седница, го одобри Предлог-законот за ратификација на Договорот за стратешка соработка меѓу Владата на Република Северна Македонија и Владата на Унгарија.
Договорот за стратешка соработка меѓу Владата на Република Северна Македонија и Владата на Унгарија беше потпишан во Скопје, на 13 јуни 2025 година. Тој беше потпишан за време на посетата на шефот на унгарската дипломатија Петер Сијарто, на која домаќин беше министерот за надворешни работи и надворешна трговија, Тимчо Муцунски.
Координаторот на пратеничката група на ВМРО-ДПМНЕ, Никола Мицевски, нагласи дека овој договор не е чин на меѓународна соработка. Тој нагласи дека тоа е јасна порака од Република Македонија дека гради одржливи, долгорочни и сигурни партнерства со вистински пријатели во време кога ни се потребни вистински партнери повеќе од кога било.
„Ова е втор стратешки договор што оваа влада го склучи во првата година од својот мандат. Овој договор треба да се поздрави како чекор во вистинската насока, насока на конкретна надворешна политика, продуктивна економска дипломатија и визионерска посветеност кон иднината на земјата. Овој договор воспоставува формално стратешко партнерство меѓу Македонија и Унгарија, земја членка на ЕУ и НАТО, со која имаме децении пријателство и стабилни политички односи. Таквото партнерство ќе овозможи унапредување на соработката во многу важни области – инфраструктура, енергетика, транспорт, информатичка технологија, сајбер безбедност и одбрана. Овие области се двигател на секој сериозен развој и гаранција за економска стабилност и безбедност, што е од особено значење во сегашната геополитичка ситуација во Европа. Договорот нуди можности за домашната економија преку активно вклучување на македонскиот приватен сектор и вклучување на странски инвеститори во реализацијата на стратешки проекти“, рече Мицевски.
Пратениците ја поддржаа и Предлог-одлуката за изменување на Одлуката за одобрување на продолжување на рокот за постоење на кризна состојба на дел од територијата на Република Северна Македонија и Предлог-законот за ратификација на Договорот за пристап до високо образование и прием на студии во Западен Балкан.