Меморандумот на Украина за решавање на конфликтот со Русија предвидува прекин на огнот на копно, море и во воздух, објави „Њујорк тајмс“, повикувајќи се на неименуван украински функционер.
„Мониторингот (на спроведувањето на договорот) ќе го вршат меѓународни партнери“, рече функционерот, осврнувајќи се на украинскиот меморандум.
Во исто време, украинскиот министер за надворешни работи Андриј Сибиха ја обвини Русија за одложување на мировните преговори, велејќи дека Москва сè уште не го доставила ветениот меморандум во кој се наведени нејзините мировни услови.
Тој рече дека украинските претставници сакаат да го видат документот пред да испратат делегација на нова рунда преговори предложена од Москва за понеделник во Истанбул.
Сибиха на прес-конференција во Киев изјави дека за кој било состанок да биде „суштински и значаен“, Украина мора „однапред да добие документ, така што делегацијата што ќе присуствува има овластување да разговара за релевантните ставови“.
Сепак, Русија соопшти дека ќе го поднесе својот меморандум за време на новата рунда разговори, што го натера Киев да ја обвини Москва за одложување.
Портпаролот на Кремљ, Дмитриј Песков, денес изјави дека меморандумот „не може да се објави“ и дека руската делегација ќе биде подготвена за средба во понеделник наутро во Турција.
Украинските власти изјавија дека Русија може да предложи услови што се неприфатливи, како што е барањето украинските трупи да се повлечат од териториите што сè уште ги контролира, а потоа да ја обвини Украина за прекинот на разговорите.