Светската здравствена организација (СЗО) денес соопшти дека здравствениот систем во Појасот Газа е на точка на прекин поради постојаните воздушни напади на израелските одбранбени сили (ИДФ).
„Изминува времето за да се спречи хуманитарна катастрофа доколку не може итно да се достави гориво и хуманитарна помош во Појасот Газа поради целосната блокада“, се вели во соопштението на СЗО, пренесува Times of Israel.
Се додава дека болниците имаат струја само за неколку часа на ден и дека се принудени да се потпираат на генератори за одржување на најважните функции.
„Дури и овие функции ќе мора да бидат прекинати за неколку дена кога ќе истечат резервите на гориво“, предупредува СЗО.
Се посочува дека акутниот недостиг на медицински материјали ја влошува кризата, а во исто време се зголемува бројот на загинати поради воздушните напади врз Појасот Газа.
Во соопштението на СЗО се наведува дека во нападите на Појасот Газа загинале 11 здравствени работници, а 16 се повредени, а оштетени се 19 здравствени установи и 20 амбулантни возила.
Светската здравствена организација повика на прекин на борбите и итно формирање на хуманитарен коридор за моментално опколената енклава.