Полскиот министер за одбрана Владислав Косињак-Камиш објави дека во оваа земја пристигнал специфичен авион што го користат силите на НАТО и дека за прв пат ќе спроведува операции од полска територија.
Според министерот, во оваа земја пристигнал E-7 Wedgetail, специјализиран авион за рано предупредување и командување што им припаѓа на австралиските воздухопловни сили.
Ова е прв пат овој авион да ја посети Полска, а тоа е особено значајно бидејќи е наменет не само за поддршка на операциите на НАТО, туку и за помош на Украина.
„Во текот на наредните недели, авионите за рано предупредување и команда E-7A Wedgetail на Кралските австралиски воздухопловни сили ќе работат од 32-та тактичка воздухопловна база во Ласк. Екипажите на E-7A ќе ги поддржат операциите на НАТО во заштитата на воздушниот простор и координирањето на воздушните операции на источниот дел од алијансата. Ова е првата мисија E-7A спроведена од полска територија. Авионот, опремен со напреден MESA радар, обезбедува 24/7 надзор и ги поддржува сојузничките операции на тактичката авијација“, изјави министерот.
Е-7 Wedgetail влезе во употреба со австралиските воздухопловни сили во 2012 година и е пренаменет Боинг 737.
Станува збор за авион за рано предупредување и контрола од воздух (AEW&C). Што се однесува до поддршката на Киев, се очекува австралискиот авион да го прави тоа преку следење на воздушниот простор и откривање на руски авиони, ракети и други воздушни закани.
Овој тип авиони можат да ги поддржат и украинските ловци, на пример, со означување на цели за напад. Е-7 може да спроведува и електронски извидувачки операции, собирајќи такви информации од растојание до 850 км. Ова значи дека ќе можат да ја следат Калининградската област, како и руските региони во близина на украинската граница и активните делови на фронтот.
Накратко, благодарение на операцијата Е-7, Украина треба да добие непроценлива информативна поддршка, што треба да ѝ овозможи уште подобро да ги координира своите одбранбени и офанзивни операции.