Коста К., момчето-убиец кое на 3. мај уби девет негови врсници и еден чувар во основното училиште „Владислав Рибникар“ во Белград, ќе го продолжи своето образование преку Интернет.
Како што дознава српскиот весник Курир, неговите часови ќе се одвиваат според моделот што се користел за време на пандемијата со вирусот Ковид-19. Масовниот убиец ќе заврши осмо одделение преку специјалното училиште „Д-р. Драган Херког“.
„Наставата ќе се организира од далечина, според програмата што веќе ја спроведува училиштето ‘Д-р. Драган Херког‘. Тоа е онлајн училница, а ќе има само еден ученик, Коста К., кој ќе ја следи наставата од неговата болничка соба. Од друга страна, ќе има професор кој ќе го подучува, ќе му дава задачи и лекции за учење“, објаснува соговорникот на српскиот весник Курир.
Да потсетиме, тогашниот 13-годишник, кој во меѓувреме наполни 14 години, не е кривично одговорен и беше сместен во затворена психијатриска клиника на денот кога го изврши масакрот во училиштето.
„Согласност за сместување на момчето-убиец во психијатриска клиника потпишала неговата мајка. Таа неодамна испратила писмо во кое бара нејзиниот син да го продолжи образованието. Бидејќи основното образование е задолжително, а наставниот совет на ‘Владислав Рибникар‘ веќе донел одлука да го исфрли од училиштето каде го извршил делото, тој ќе го продолжи образованието во друго училиште, кое веќе има искуство со работа со деца од далечина и во специфични услови“, објаснува соговорникот на српскиот весник Курир.
„Но, за да нема некакво недоразбирање, иако часовите ќе се следат онлајн, преку Интернет, тоа не значи дека ќе можат да користат Интернет за други работи, видео игри, читање вести или нешто слично“, додал соговорникот.
Според него, на момчето ќе му бидат донесени учебници за осмо одделение од кои по завршувањето на наставата ќе може да продолжи да учи.
Момчето-убиец е во психијатриска клиника под строго контролирани услови, а полицијата постојано дежура во делот од зградата каде што се наоѓа, како и пред самата клиника.
„Не смее да шета или да гледа други пациенти. Не смее ниту да излегува од собата кога сака, а некој од неговите роднини редовно му носат работи“, открил претходно извор на српски Курир.