„Источноукраинскиот град Бахмут, кој е во центарот на неколкумесечниот конфликт, е под притисок на руската армија и руската паравоена група Вагнер. Градот би можел да падне во наредните денови“, предупреди денеска генералниот секретар на НАТО, Јенс Столтенберг.
„Не можеме да ја исклучиме можноста дека Бахмут на крајот ќе падне“, посочи Столтенберг на маргините на состанокот на европските министри за одбрана во Стокхолм.
Бахмут е во фокусот на неколкумесечните интензивни борби меѓу Украина и Русија.
Лидерот на руската паравоена група Вагнер денеска изјави дека неговите војници го зазеле „целиот источен дел“ на Бахмут, центарот на борбите во источна Украина.
Украинскиот претседател Володимир Зеленски изјави синоќа во интервју за CNN дека неговите војници се решени да го задржат тој град и дека падот на градот ќе остави „отворен пат“ за Русите кон другите градови во источна Украина.
Првиот човек на НАТО ја минимизираше стратешката важност на веќе уништениот град Донбас, кој Русија вети дека ќе го освои и покрај големите загуби.
„Ова неизбежно не значи некаков пресврт во војната, но укажува дека не треба да ја потценуваме Русија. Треба да продолжиме да ја поддржуваме Украина“, изјави Столтенберг за новинарите.
Според Москва, заземањето на градот ќе овозможи „нови офанзивни операции во длабочините“ на Украина.
Министрите за одбрана на ЕУ денеска изнесоа план за испорака на проектили и муниција во Украина, иако нивните залихи се под притисок.