Само седум од 30-те земји на Алијансата ја исполнија сегашната цел да потрошат два отсто од БДП за одбрана во 2022 година.
Генералниот секретар на НАТО Јенс Столтенберг ги повика земјите-членки да го забрзаат зголемувањето на трошоците за одбрана, бидејќи новите бројки покажуваат дека помалку од една четвртина ја исполнуваат целта на Алијансата.
Столтенберг рече дека рускиот напад врз Украина минатата година покажал дека светот станал понесигурен и дека сојузниците на НАТО мора да одговорат со поставување и исполнување на поамбициозни воени цели, пренесува Танјуг, повикувајќи се на Ројтерс.
Според проценките во годишниот извештај на генералниот секретар на НАТО, седум од 30-те земји на Алијансата ја исполниле сегашната цел да потрошат два отсто од БДП за одбрана во 2022 година, еден помалку отколку во 2021 година, пред војната во Украина.
Столтенберг рече дека очекувањата на НАТО се уште две членки да ја исполнат целта, но нивните економии пораснале повеќе од очекуваното, па нивните трошоци паднале како дел од БДП.
Постојано зголемување
Членките на НАТО постојано ги зголемуваат трошоците за одбрана откако руските сили го зазедоа Крим и влегоа во Донбас во источна Украина во 2014 година, но Столтенберг рече дека целосната војна минатата година ја истакна потребата да се трошат повеќе.
„Нема сомнеж дека треба да направиме повеќе и да го направиме тоа побрзо. Сегашното темпо на зголемување на трошоците за одбрана не е доволно високо. Мојата порака до сојузниците е дека го поздравуваме она што тие го направија, но тие мора да се засилат и да распределат повеќе во поопасен свет“, рече тој.
Извештајот на Столтенберг за 2022 година покажа дека Грција, САД, Литванија, Полска, ОК, Естонија и Летонија ја исполниле целта од два проценти.