Петер Сијарто, министерот за надворешни работи на Унгарија, денес соопшти дека Унгарија го поддржува приемот на Шведска во НАТО.
Медиумската агенција Bloomberg пишува дека Петер Сијарто изјавил дека останува само „техничко прашање“ за да се заврши долгиот процес на ратификација во парламентот во Будимпешта.
Bloomberg потсетува дека првиот човек на дипломатијата во Владата на унгарскиот премиер Виктор Орбан минатата недела изјави дека Унгарија ќе го поддржи влезот на Шведска во НАТО веднаш штом Турција, која е другата членка на Алијансата која ја блокираше апликацијата на Шведска за членство, дава индикации дека е подготвена да го стори истото.
Bloomberg наведува дека Турција сега го дала тој сигнал, но додава и дека Петер Сијарто експлицитно не ја споменал оваа земја во објавата на социјалната мрежа Фејсбук што ја објави пред да замине на самитот на НАТО во литванската престолнина Вилнус.
Генералниот секретар на НАТО, Јенс Столтенберг, синоќа објави дека турскиот претседател Реџеп Таип Ердоган се согласил Шведска да влезе во НАТО. Тој претходно се состана со „султанот“ и шведскиот премиер Улф Кристерсон за да разговараат за загриженоста на Турција во врска со дозволувањето на Шведска да се приклучи на НАТО.
Реџеп Таип Ердоган претходно истиот ден кажа дека Анкара ќе го поддржи членството на Шведска во НАТО доколку Европската унија повторно ги отвори преговорите за членство на Турција во Европската унија.