Научниците го создадоа првиот тест на урина што може да укаже на раните знаци на рак на белите дробови.
Многу случаи на рак на белите дробови се дијагностицираат во подоцнежните фази, што значи дека болеста може да биде потешка за лекување, а истражувачите се надеваат дека раното откривање може да значи дека пациентите ќе добијат третман порано, што ќе им даде подобри шанси да ја победат болеста.
„Пионерскиот“ тест бара таканаречени „зомби“ клеточни протеини кои би можеле да укажат на тоа дека пациентот има рак на белите дробови во неговите најрани фази.
Успешно е тестиран на глувци и научниците се надеваат дека наскоро ќе почне да им користи на луѓето.
Научниците од Универзитетот во Кембриџ и Институтот за ран рак ги испитуваа протеините што се лачат од старите клетки.
Овие клетки често се нарекуваат „зомби клетки“ бидејќи се живи во телото, но не можат да растат и да се делат.
Клетките предизвикуваат оштетување на ткивото со репрограмирање на нивната непосредна околина за да помогнат во појавата на клетките на ракот.
Сега научниците развија сензор кој комуницира со протеините на „зомби клетките“ и ослободува лесно забележливо соединение во урината, што го сигнализира нивното присуство.
„Знаеме дека пред да се појави ракот, има промени во погодените ткива. Една од промените е акумулацијата на оштетените клетки кои не се доволно оштетени за да се отстранат, но доволно за да се ослободат сигнали кои го репрограмираат ткивото и го прават совршено за развој на рак“, изјави професорката Љилјана Фрук.
Научниците кои стојат зад студијата, финансирана од Канцер Рисрч ОК, рекоа дека сакаат да развијат тест кој ќе биде поевтина алтернатива на скапите скенирања.
Ракот на белите дробови е водечка причина за смрт од рак во светот, со приближно 1,8 милиони смртни случаи секоја година.
Стапките на преживување се особено ниски за оние со напредни форми на болеста, каде што туморите се прошириле.