Јужна Европа го доживува својот прв голем топлотен бран ова лето, со температури над 40 Целзиусови степени во Италија, Шпанија, Грција, Португалија и Франција, што предизвика предупредувања од здравствените власти и го зголеми ризикот од пожари.
Во Португалија од вчера две третини од земјата беа ставени во состојба на високо предупредување, при што се предвидува дека температурите во главниот град Лисабон ќе достигнат 42 Целзиусови степени.
Националната метеоролошка служба издаде предупредувања за екстремна опасност од пожари низ поголем дел од територијата.
Шпанската метеоролошка агенција Аемет издаде посебно предупредување, посочувајќи дека „многу високите и континуирани температури“ би можеле да претставуваат сериозна закана за ранливата популација, особено во јужниот град Севиља, каде што температурите достигнаа 42 Целзиусови степени.
Здравствените власти ја повикаа јавноста да избегнува изложување на сонце, да консумира вода и да ги проверува постарите лица и лицата со хронични заболувања.
Во Италија, Министерството за здравство стави 21 од 27 поголеми градови во земјата, вклучително и Рим, Милано и Неапол, под црвено предупредување.
Неколку региони, меѓу кои и Лацио, Тоскана и Умбрија, објавија планови за прекин на работата на отворено за време на високите жештини.
Во Сицилија и Лигурија веќе се воведени забрани за работа на отворено, а синдикатите бараат од Владата да ги прошири ваквите мерки низ цела земја. Франција, исто така, се подготвува за екстремни температури, при што 84 од нејзините 101 оддел се ставени под тревога за топлотен бран бидејќи прогнозите укажуваат на максимални температури над 40 Целзиусови степени.
Во регионот пожарите предизвикаа евакуација на камп и манастир. Во Марсеј, јавните базени беа отворени бесплатно за да им се помогне на жителите да се справат со топлотниот бран.
Во Грција, властите интервенираа во големиот шумски пожар што избувна јужно од Атина во четвртокот. Пет области беа евакуирани, а дел од крајбрежниот автопат во близина на античкиот храм на Посејдон беше затворен поради пожарот.
Во Велика Британија е издадено жолто предупредување за пет региони, Источен Мидлендс, Југоисток, Југозапад, Лондон и Источна Англија, при што денес се очекува температурите да достигнат 36 Целзиусови степени.
Овој топлотен бран доаѓа откако Коперник, Агенцијата на Европската Унија (ЕУ) за следење на климата, потврди дека март 2025 година бил најжешкиот март досега регистриран во Европа, со просечни температури 2,41 Целзиусови степени над нормата за периодот од 1991 до 2020 година.