Министерот за внатрешни работи, Панче Тошковски, откри дека дел од пожарите што со денови се активни низ целата земја се намерни. Според него, дел од пожарите се резултат на силни ветрови и лоши временски услови, но за некои од нив вели дека постојат основани сомневања дека се предизвикани намерно.
„Штом вториот пожар ќе биде неутрализиран и локализиран, веднаш започнува трет пожар. Сите овие се поврзани со клучна државна инфраструктура и постојат силни сомневања кај професионалците во Министерството за внатрешни работи – информиран сум дека се сомневаат – дека станува збор за специфично сценарио кое треба да се спроведе во Македонија“, изјави Панче Тошковски, министер за внатрешни работи.
Во справувањето со пожарите, од вчера е активиран и европскиот механизам за помош, кој ќе помогне во нивното гаснење.
„Европскиот механизам за помош за справување со пожарите е активиран и сите државни капацитети се ставени во максимална функција. Можам да нагласам дека Грција стави на располагање на државата два „канадски“ авиони, кои ќе се користат за гаснење на пожарите, како и два пешадиски тима кои се ставени на располагање преку механизмот на ЕУ“, изјави Панче Тошковски, министер за внатрешни работи.
Тошковски, сепак, нагласи дека поголемиот дел од пожарите се ставени под контрола, истакнувајќи дека припадници на противпожарните единици, Дирекцијата за заштита и спасување, Министерството за внатрешни работи, Армијата и Центарот за управување со кризи се постојано на терен.