Универзитетот Харвард не успеал да ги заштити еврејските студенти од вознемирување, заклучи администрацијата на Доналд Трамп по истрагата, заканувајќи се дека ќе го прекине целото федерално финансирање од престижниот универзитет доколку не преземе соодветни мерки.
Федерална работна група испрати писмо до Харвард во понеделник, тврдејќи дека институцијата ги прекршила законите за граѓански права што бараат од колеџите да ги заштитат студентите од дискриминација врз основа на раса или национално потекло.
Истражителите откриле дека Харвард во некои случаи „намерен учесник во антисемитско вознемирување на еврејски студенти, факултет и персонал“ и дека универзитетските раководители дозволиле антисемитизмот да „се шири“ на кампусот во Кембриџ, Масачусетс.
– Неуспехот да се спроведат соодветни промени веднаш ќе доведе до губење на сите федерални финансиски ресурси и трајно ќе влијае на односот на Харвард со федералната влада – се наведува во писмото до кое дојде агенцијата АП, а кое првпат го објави „Волстрит џурнал“. Харвард не ги коментираше веднаш обвинувањата.
Ова е најновата ескалација во конфликтот на Белата куќа со Харвард, кој веќе изгуби повеќе од 2,6 милијарди долари федерално финансирање откако отфрли низа барања од американската влада, кои вклучуваа фундаментални промени во управувањето, вработувањето и процесот на прием на универзитетот.