Поранешниот американски претседател Доналд Трамп денеска го нарече „многу нефер“ судењето во кое беше прогласен за виновен за прикривање пари и фалсификување деловни документи во четвртокот пред судот во Њујорк.
„Што се однесува до самото судење, тоа беше многу нефер. Во никој случај не можевме да го искористиме нашиот избран експерт. Видовте што се случи со некои од сведоците кои беа на наша страна, тие беа буквално распнати од судијата“, рече Трамп на новинарите откако беа осудени во случајот за плаќање пари во замена за молчење на порно актерката Сторми Даниелс за наводната врска во која биле, како и за фалсификување документи, пренесува Си-Ен-Ен.
Трамп продолжи да го критикува судијата Хуан Меркан, велејќи дека „тој изгледа како ангел, но всушност е ѓаволот“. „Никогаш судијата не бил поконфликтен. Сега сум под забрана за говор, каква што никој никогаш не бил, ниту еден претседателски кандидат досега не бил под забрана за говор. Некои лоши луѓе се виновни за ова. Ако можат да го направат ова за мене, тие можат да му го направат ова на секого“, продолжи тој.
Трамп денеска беше прогласен за виновен од поротата на Окружниот суд во Менхетен по 34 точки од обвинението. Меркан го одреди 11 јули како датум кога Трамп ќе биде осуден.