Рускиот претседател Владимир Путин јасно стави до знаење како Москва ќе одговори на потенцијалните испораки на американски крстосувачки ракети „Томахавк“ на Киев, изјави портпаролот на Кремљ, Дмитриј Песков.
„Што се однесува до ставот на Москва, претседателот Путин го искажа сосема недвосмислено на неодамнешниот состанок на Валдај клубот. Таму сè беше експлицитно“, рече Песков, според руската државна новинска агенција Тасс.
Што рече Путин?
Во четврток, Путин на пленарната седница на меѓународниот дискусиски клуб „Валдај“ изјави дека е невозможно да се користат ракети „Томахавк“ без директно учество на американските сили, „што би значело сосема нова, квалитативно поинаква фаза на ескалација, вклучително и ескалација меѓу Русија и САД“.
„Ова оружје нема да ја промени ситуацијата на бојното поле, но е сериозно оружје, иако не е најновото, а самата идеја за вакви испораки е опасна. Руските системи за воздушна одбрана се прилагодија на ракетите ATACMS, тие исто така ќе се прилагодат на Томахавците и ќе ги соборат“, истакна тој.
Дополнително, тој во неделата предупреди дека потенцијалната одлука на Вашингтон да испрати ракети „Томахавк“ во Киев ќе ги поткопа позитивните трендови во односите меѓу Русија и САД.
Трамп: Би сакал да им поставам неколку прашања на Украинците
Да ве потсетиме дека американскиот претседател Доналд Трамп синоќа зборуваше за можната испорака на Томахавци во Украина. На прашањето на новинарите во Овалната соба дали донел одлука за испорака на Томахавци во Украина, Трамп одговори: „Донесов одлука до одреден степен, да речеме“.
Трамп истакна дека сака да знае што планираат да прават Украинците со тие ракети пред да бидат испорачани. „Каде ги испраќаат, претпоставувам дека ќе треба да го поставам тоа прашање. Би поставил неколку прашања. Не сакам да видам ескалација“, рече американскиот претседател.