Унгарија се стреми да ги здружи силите со Чешка и Словачка за да формира сојуз во ЕУ кој е скептичен кон Украина, изјави за „Политико“ висок политички советник на унгарскиот премиер Виктор Орбан.
Орбан се надева дека ќе ги здружи силите со Андреј Бабиш, чија десничарска популистичка партија победи на неодамнешните парламентарни избори во Чешка, како и со словачкиот премиер Роберт Фицо, за да ги усогласат ставовите пред состаноците на лидерите на ЕУ, вклучително и одржувањето состаноци пред самитот, рече помошникот.
Иако силен политички сојуз е сè уште далеку, формирањето би можело значително да ги попречи напорите на ЕУ за финансиска и воена поддршка на Украина, објавува „Телеграф“.
„Мислам дека ќе дојде – и ќе биде сè повидливо“, рече политичкиот директор на премиерот, Балаж Орбан, кога беше прашан за потенцијалот сојузот скептичен кон Украина да почне да дејствува како блок во Европскиот совет.
„Функционираше многу добро за време на миграциската криза. Така успеавме да се спротивставиме“, рече тој за таканаречената Вишеградска 4 група составена од Унгарија, Чешка, Словачка и Полска во време кога евроскептичната партија „Право и правда“ беше на власт во Варшава по 2015 година.
Токогашниот полски премиер, Матеуш Моравјецки, го предводеше нападот како најголем член на алијансата, при што групата „В4“ промовираше просемејни политики, како и силни надворешни граници за ЕУ, и се спротивставуваше на какво било присилно преместување на мигранти меѓу земјите-членки.
Вишеградската четворка се подели по целосната инвазија на Русија врз Украина, при што Полска поддржа агресивни ставови кон Москва, а Унгарија зазеде спротивен став.
Новата Вишеградска алијанса би броела три наместо четири члена. Сегашниот премиер на Полска од десниот центар, Доналд Туск, е силно проукраински ориентиран и веројатно нема да влезе во каков било сојуз со Орбан.
Сепак, Фицо и Бабиш ги поддржаа ставовите на унгарскиот лидер за Украина, повикувајќи на дијалог со Москва наместо на економски притисок.
Бабиш беше критикуван поради неговиот јавен скептицизам во поддршката на понатамошната европска помош за Киев, а сегашниот чешки министер за надворешни работи предупреди во интервју за POLITICO дека Бабиш ќе дејствува како „марионета“ на Орбан на масата на Европскиот совет.
Сепак, можеби ќе биде потребно извесно време за да се реформира која било верзија на Вишеградската алијанса. Иако беше реизбран за премиер на Словачка во 2023 година, Фицо не се обиде да склучи формални сојузи со унгарскиот лидер за специфични области на политиката. Бабиш сè уште не формирал влада по неодамнешната изборна победа на неговата партија.
„Напорите на Унгарија за политички сојузи во Брисел одат подалеку од Европскиот совет“, рече Балаш .
Партијата Фидес на унгарскиот премиер – дел од крајно десничарската група „Патриоти за Европа“ – би можела да ги прошири своите партнерства во Европскиот парламент, рече тој, наведувајќи ја десничарската група „Европски конзервативци и реформисти“, крајно десничарската група „Европа на суверени нации“ и „некои левичарски групи“ како потенцијални сојузници.