Турскиот претседател Реџеп Таип Ердоган денеска официјално ја отвори поранешната византиска црква Хора во Истанбул како џамија, четири години откако неговата влада ја прогласи за муслиманско место за богослужба, и покрај критиките од соседна Грција.
Ердоган претседаваше со церемонијата на отворање на џамијата Хора, преку интернет, од конференциската сала на неговата палата во Анкара.
Црквата Свети Спас во Хора, позната и како Карије, беше прогласена за џамија во 2020 година, не долго откако истото се случи и со Света Софија, која пред тоа беше црква, џамија, потоа музеј и на крајот повторно џамија.
И двата чина на претворање на црквите во џамии предизвикаа големи контроверзии во светот и во самата Грција, која побара од турската влада да ги заштити важните византиски споменици.
Црквата во Хора, како и Света Софија, била музеј пред да биде претворена во џамија, а нејзината официјална преобразба во муслиманска куќа за молитва постојано се одложувала бидејќи зградата била подложена на реставрација.
Црквата, која се наоѓа во близина на античките градски ѕидини на византиски Константинопол, е позната по своите мозаици и фрески. Датира од четвртиот век, иако зградата ја добила сегашната форма во 11-12 век. По падот на Константинопол под турска власт во 1453 година, таа служела како џамија, додека во 1945 година не била претворена во музеј.